Sajak Anjeun Moal Surti

ANJEUN MOAL SURTI
Sok hayang cumarita, lain ku letah, tapi ku hate,
jeung saniskara basa nu teu kelu dilisankeun,
cenah ceuk anjeun kacangkem, kalayan gembleng,
piraku wae ketang,
batan parahu pamayang jeung gupay daun kalapa
nu rajeg dibasisir, sieup repok jodo,
geusan silih ayunkeun kahayang….!

Sok hayang nembang, lain ku haleuang, tapi ku angen-angen,
jeung sakabeh dangding nu teu kungsi dikawihkeun,
cenah ceuk anjeun geus kalapal, kalayan masket,
piraku wae ketang,
batan cai pancuran jeung batu demprak di tampian,
nu unggal isuk ka cai sabunan bisa ihlas,
hanteu silih hualkeun….!

Sok hayang nitipkeun beja, tapi ulah betus tina biwir,
keun teuing situ gunung teu boga ombak,
atawa angin pasir moncor teu kataheunan dapuran awi,
jeung tangkal cau nu ngarangrangan,
ngajirim karakas garing jeung silalatu, nu hideng miang,
geusan wakca ku kalimah munggaran,
nu kuring yakin, anjeun moal surti….! (*)

Kintunan : Anissa PR, Guru SDN 01 Cimande, Caringin