SAJAK PONDOK PIKEUN HIDEP

SAJAK PONDOK PIKEUN HIDEP

Saha tea atuh nu bieu jajap hidep teh ?
Teu patos teges kanggo Ibu mah, batan mega sareng pepedut
Nu ngadingding nyimbutan wangunan sakola urang
Janten hahalang….

Putra saha tea atuh hidep teh ?
Teu patos jinek kanggo Ibu mah, batan puluh atawa welas taun
Ibu tos kayid moal rek openan ngaguar lalakon heubeul
Ngan wae ari eta sorot soca hidep, nu bangbaraan
Atawa goloyoh teunanganana mapah hidep, nu sasampayan
Moal teuing Ibu rek kapalingan…

Urang mana tea atuh hidep teh ?
Najan estu panasaran, tapi Ibu moal teuing kersa tumaros
Wios Ibu mah rek betah ngadeg di dieu,
Disatukangeun panto sakola, neuteup ka luar jandela,
Betah mancakrama sareng kalangkang heubeul
Nu ngajirim lebah seahna sora, duka boga saha boa…. (*)

Anissa Puji Rahmawati, Guru SDN 01 Cimande, Caringin, Bogor