Benteng Jawa Barat

SUNDAURANG.ID -- Sami tanggalna, 20 Mei tapi beda taunna, Poe Kebangkitan Nasional dipieling sakalian jeung Poe Lahirna Kodam III Siliwangi, anu salila ieu jadi benteng Jawa Barat tina sagala rupa gangguan kaamanan.

Nurutkeun catetan sajarahna, Kodam III Siliwangi nu diwangun tanggal 20 Mei 1948 ngarupakeun gabungan ti 3 Divisi di daerah Jawa Barat jeung sabudeureun. Kaasup Divisi munggaran nu diwangun ku militer Indonesia sanggeus kaluarna parentah diwangunna TKR dina 5 Oktober 1945 dina mangsa perjoangan kamerdekaan. Sanajan nalika diadegkeun ampir bareng jeung sababaraha Divisi sejenna harita, ngan bae ngaran "Siliwangi" wungkul nu masih awet nepi ka diwangunna Kodam III Siliwangi.

Nu ngalegenda ti Kodam Siliwangi nyaeta pamakean ngaran "Siliwangi" nu tetep dipertahankeun ti awal ngadegna di mana loba Divisi nu harita nu robah-robah ngarana husuna dina mangsa rekstrukturisasi TNI saperti Brawijaya nu kakara boga ngaran tanggal 17 Desember 1951, nu tadina Divisi Jawa Timur (Gabungan sababaraha Divisi tempur di Jawa Timur) atawa Bukit Barisan nu kakara boga ngaran tanggal 20 Juni 1950. Hal ieu teu leupas tina jasa AH Nasution sabage panglima munggarannana nu kacida giat dina nulis fakta-fakta sajarah. Hal ieu anu ngajadikeun ngaran Siliwangi kacida kakoncara dina dina sajarah militer Indonesia dibandingkeun Kodam sejenna.

Siliwangi oge jadi kacida konyasna berkah tina record Tour of Duty-na nu kawilang luhru dina numpes pemberontakan di Nusantara, mimiti ti Operasi pembersihan komunis di Madiun, jeung ngancurkeun gerakan DI/TII di Jawa Barat. Kodam Siliwangi oge ngarupakeun wadah tempat lahirna pasukan elite komando munggaran Indonesia nalika dipingpin ku AE Kawilarang, ditambah ku lokasina nu deukeut jeung Jakarta, Kodam ieu oge boga peran penting dina numpes G30S/PKI dina dekade 60-an

Masih nurutkeun catetan nu aya, Kodam III Siliwangi kawilang kakoncara du dunya militer Indonesia lantaran record tour of duty-na nu kawilang luhur. Ampir sakumna operasi militer di nusantara, sarta malahan misi-misi perdameyan PBB ngalibetkeun satuan teritorial asal Priangan ieu. Unsur-unsur tempur ti Kodam Siliwangi nu diwakilkan ku Batalyon Kujang junun newak SM Kartosoewiryo di gunung Geber, nalika Operasi Pagar Betis pemberantasan DI/TII dilancarkeun nu nandaan ahir tina gerakan kasebut.

Dituluykeun ku operasi panumpesan PRRI/Permesta di Sumatera nu ngarupakeun tugas munggaran Siliwangi di luar pulo Jawa. Nalika perang saudara kajadian di Kongo, pamarentah marentahkeun Kodam Siliwangi sangkan nyiapkeun satuannana pikeun milu aub ka pasukan PBB nu dipiwanoh kalawan ngaran Konga II atawa Kontingen Garuda II nu kawilang junun. Record militerna henteu nepi ka dinya. Nalika Soumokil cs ngumumkeun ngadegna RMS, Kodam Siliwangi diBKO-keun bareng satgas TNI sejenna milu ngagempur kadudukan RMS. Harita, AE Kawilarang nu ngajabat Pangdam ngarasa terkesan, ku resistance pihak RMS nu dimotoran ku urut pasukan komando Belanda. Pamustunganana, anjeunna mutuskeun diwangunna pasukan komando munggaran Indonesia RPKAD.

Nu mimitina ngarupakeun satuan tempur di lingkungan Kodam Siliwangi, nepi ka ahirna diserahtarimakeun ka direktorat AD nu satuluyna dijadikeun kesatuan anu mandiri. Nalika Kahar Muzakar berontak di Sulawesi, Pangdam Kodam XIV Hasanuddin Kolonel M Jusuf menta sangkan dibere akses pikeun nga-BKO-keun unsur-unsur Siliwangi dina komandona, lantaran teu percaya ka pasukan lokal ti Kodam Hassanudin, sarta leuwih percaya kana kualitas tempur ti Yon-yon Infanteri Siliwangi. Seueur keneh carita-carita hebat, tapi samentara ieu ngan sakitu nu tiasa kapidangkeun. Wilujeung Tepung Taun ka-66 Kodam III Siliwangi .... (*) Mang Yabu, tina sawatara bahan aosan