Gali Implementasi Merdeka Belajar, Kemendikbud Ristek ka Bogor

SUNDAURANG.ID -- Kementerian Pendidikan, Kebudayaan, Riset jeung Teknologi (Kemendikbud Ristek), liwat Balai Besar Penjaminan Mutu Pendidikan (BBPMP) Provinsi Jawa Barat, ngayakeun press tour pakait Kabijakan Merdeka Belajar, ka Kota Bogor. Press Tour anu diiluan ku 15 urang ti lintas sektor jeung media kasebut, ditarima langsung ku Wakil Wali Kota Bogor, Dedie A. Rachim, di ruang Paseban Sri Bima, Balai Kota Bogor, Salasa (16/5/2023).
Kepala BBPMP, Sri Wahyuningsih, netelakeun yen dina bulan Merdeka Belajar ieu, pihakna meunang pancen pikeun ngalakukeun diskusi, narima masukan, sarta informasi jeung capaian implementasi Kurikulum Merdeka. Dipilihna Kota Bogor pikeun ngalaksanakeun Press Tour teh kulantaran jadi salah sahiji kota anu nerapkeun implementasi kurikulum Merdeka Belajar sacara menyeluruh, jeung aya di urutan kaopat sa-Jawa Barat.
“Jadi, aya genep indikator penerapan Merdeka Belajar. Salah sahijina nyaeta kumaha unggal wilayah bisa ngalakukeun usaha paningkatan kana program di sakolana, da ieu teh salah sahiji strategi ngarotjatkeun mutu pendidikan,” ungkabna.
Indikator saterusna nyaeta fasilitas anu disadiakeun pikeun kurikulum belajar ku cara digitalisasi. “Capaian di Kota Bogor teh mampuh ngahontal ekspektasi anu dipiharep. Jadi, hasilna geus alus pisan, ngan kari dilengkepan wungkul,” ungkabna.
Dina eta kasempetan, wawakil ti jurnalis anu miluan Press Tour bisa tatanya pakait Merdeka Belajar. Sababaraha pertanyaan anu ditanyakeun di antarana nyaeta ngeunaan implementasi Merdeka Belajar jeung cara Kota Bogor ngarojatkeun mutu pendidikan jeung nambah sakola.
Wakil Wali Kota Bogor, Dedie A. Rachim netelaekun, ieu model Merdeka Belajar teh bisa mere kasempetan ka siswa pikeun fokus kana minat, bakat, jeung kamampuhna dina widang seni, sosial, kabudayaan, olahraga, jeung sajabana. Ku kituna, salian ti dina widang akademis, siswa oge bisa ngembangkeun minat, bakat, jeung kamampuhna. Dedie oge ngapresiasi salah sahiji sakola dasar, nyaeta SDN Bubulak 3, anu dina situasi jeung kondisi nu aya, angger sumanget pikeun nerapkeun Merdeka Belajar.
“Sim kuring yakin, ku komunikasi, akselerasi anu dibangun ti mimiti, boh jeung provinsi, boh jeung pamarentah kota, sarta peserta didik jeung wali murid, bisa ngalahirkeun sacara alami implementasi Merdeka Belajar,” ungkabna.
Tujuan ahir tina Merdeka Belajar teh nyaeta kaciptana siswa-siswi anu miboga karakter, pikeun mapag Indonesia Emas 2045. Di Kota Bogor, Pemkot, liwat dinas, miboga sababaraha program pikeun ngadorong Merdeka Belajar. Tapi, Dedie ngaku yen aya pasualan teknis anu disanghareupan ku Kota Bogor pakait lilana waktu sakola. Da, rata-rata budak sakola di Kota Bogor teh aya di tingkat SMP keneh.
“Jadi, sim kuring saparakanca ngadorong, utamana aya paningkatan jumlah sakola anu nyumponan, di Kota Bogor. Ayeuna teh SMA negeri di Kota Bogor ngan aya 10 sakola,” ungkabna.
Dedie oge ngaapresiasi program Merdeka Belajar anu bisa ngaronjatkeun mutu pendidikan di Kota Bogor leuwih hade deui. Kepala Dinas Pendidikan (Disdik) Kota Bogor, Sujatmiko Baliarto, netelakeun, Merdeka Belajar oge sajalan jeung program Bogor Berlari. Ayeuna teh, Kota Bogor terus ngagencarkeun digitalisasi sakola. ( /gege)