Mahasiswa FISIPKOM Unida Jadi Pinunjul 2 dina Lomba Komunikasi Skala Nasional

SUNDAURANG.ID --Mahasiswa Program Studi Sains Komunikasi Fakultas Ilmu Sosial Ilmu Politik jeung Ilmu Komputer (FISIPKOM) Universitas Djuanda (Unida) ngahontal prestasi deui. Dina ieu kasempetan, Mahasiswa Sains Komunikasi Semester 4, nyaeta Uswatun Khasanah, Aji Santoso, jeung Muthiara Sjahrani Umam (Tim Trispektif) geus junun jadi pinunjul 2 dina Mata Lomba Jurnalisme (Journalight), dina Lomba Komunikasi Pekan Komunikasi 2023, anu dicalagarakeun ku Departemen Komunikasi Fakultas Ilmu Sosial Ilmu Politik (FISIP) Universitas Indonesia (UI).
Dekan FISIPKOM Unida, Ginung Pratidina, ngucap syukur jeung milu bungah kana prestasi anu dihontal ku mahasiswana.
“Alhamdulillah, Mahasiswa Unida ngahontal prestasi deui dina lomba komunikasi anu skalana nasional. Sim kuring ngahaturkeun pangwilujeng ka Trispektif, sarta ngahaturkeun nuhun ka sakabeh Dosen FISIPKOM, anu geus ngabingbing nepi ka bisa ngalahirkeun mahasiswa-mahasiswa pikeun ngahontal prestasi,” ceuk Dekan Ginung.
Dekan Ginung ngaapresiasi kana naon anu geus dihontal ku Tim Trispektif, kulantaran proses anu diliwatanna teh henteu babari, da kudu ngaliwatan tilu fase, nyaeta babak penyisihan, semi final, jeung presentasi final, di FISIP UI.
Dekan Ginung miharep, Mahasiswanya ti Program Studi Administrasi Publik, Sains Komunikasi jeung Ilmu Komputer bisa terus sumanget diajar, sangkan bisa ngahontal prestasi jeung mere mangpaat pikeun masyarakat.
Pekan Komunikasi teh mangrupa palombaan komunikasi skala nasional anu dicalagarakeun ku Departemen Ilmu Komunikasi FISIP UI. Dina lomba Pekan Komunikasi, aya sababaraha lomba, nyaeta Journalight (Journalisme), Media Matters, PR Vaganza, jeung Advertising War.
Ketua Tim Trispektif, Uswatun Khasanah, ngucap syukur kana prestasi anu dihontalna. Salian ti prosesna anu panjang jeung hese, ieu Mahasiswa Sains Komunikasi Unida oge geus junun ngahontal prestasi di antara dua wawakil tim ti Universitas Negeri, nyaeta ti Tim Eunoia Universitas Negeri Surabaya (Unesa) anu jadi pinunjul hiji, jeung Tim Biduan Universitas Udayana Bali anu jadi pinunjul tilu.
“Alhamdulillah bisa jadi pinunjul kadua. Perjuangan anu salila ieu dilakukeun teh aya hasilna. Ti mimiti nyieun feature di penyisihan, terus migawe brief pikeun semi final. Padahal mah eta teh mapag lebaran. Alhamdulillah bisa asup final, terus presentasi di FISIP UI,” ceuk Uswatun, sanggeus narima panghargaan di Awarding Day Pekan Komunikasi UI, Saptu, (13/5/2023) di FISIP UI", ungkabna.
Uswatun nambahkeun, dina ieu Lomba Pekan Komunikasi 2023, Trispektif nyieun naskah feature ngeunaan kelompok Disabilitas anu minim akses jeung mindeng disapirakeun. Dina babak semi final jeung final, sakabeh semi finalis jeung finalis dipenta nyieun konsep Newsgames atawa mintonkeun berita liwat kaulinan.
“Newsgame anu sim kuring saparakanca pintonkeun nyaeta Dicebility. Ieu teh mangrupa kaulinan saperti monopoli, anu ngajak masyarakat pikeun nguriling ka tempat-tempat ramah disabilitas, minangka bentuk informasi. Terus di unggal pemberhentian, peserta baris meunang pertanyaan atawa pernyataan anu eusina ngeunaan pangaweuh jeung baris meunang point rewards upamana bisa ngajawab. Sanggeus nguriling hiji puteran, point rewards kasebut baris diakumulasi jeung jadi donasi pikeun para penyandang disabilitas, mangrupa daging, buah, susu, cocooan, buku-buku, atawa barang sejenna anu mangpaat pikeun para disabilitas,” ungkabna. (*/rb/gege)