Penyelenggara Sakola Swasta Tambah Elmu Ngeunaan Perpajakan

SUNDAURANG.ID--BMPS ngalaksanakeun deui kagiatan pikeun para penyelenggara Sakola Swasta di Kota Bogor. Ayeuna, workshopna nyokot tema “Paningkatan Kredibilitas Yayasan liwat Akuntabilitas Pangelolaan Pajak”. Ketua BMPS, Ade Sarip Hidayat, ngaku, para penyelenggara pendidikan swasta miboga kawajiban pikeun nepikeun laporan pajak, minangka bentuk pertanggungjawaban ka stakeholder pendidikan.
“Ieu hal nuduhkeun yen penyelenggara bener-bener merhatikeun aspek penyelenggaraan anu transparan jeung ngadorong mutu minangka indikator akhir ti lembaga pendidikan,” ungkabna.
Wawakil Kantor Pelayanan Pajak Kota Bogor, Arif, hadir salaku narasumber. Arif medar pakait objek anu dikeunaan pajak jeung anu henteu dikeunaan pajak.
Peserta kaciri antusias, kulantaran, sihoreng salila ieu teh loba persepsi anu salah keneh ngeunaan pajak yayasan. Contona, beasiswa, bantuan hibah, sesa dana pangelolaan upamana dijadikeun pangwangunan sarana, henteu keuna pajak. Pertanyaan-pertanyaan ge diajukeun ku para peserta seminar kasebut.
Kagiatan BMPS teh didukung ku Bank BJB Cabang Bogor, anu sababaraha programna mihak ka dunya pendidikan. Antara lain, mere kamudahan ka pendidik upamana aya kaperluan pikeun panyumponan karaharjaan para pendidik. Sedengkeun, keur yayasan mah, pikeun pangembangan sarana jeung prasarana pendidikan.
Ketua Panitia, Dian Wulandari, netelakeun, ieu kagiatan teh jadi prakagiatan Paningkatan Kapasitas Penyelenggara Sakola Swasta anu baris geura dilaksanakeun.
“Mugia ieu kagiatan mampuh ngaronjatkeun kualitas pelayanan pikeun masyarakat. Ku kituna, mutu pendidikan di Kota Bogor oge miluan ngaronjat,” ungkabna. (*r/gege)